KALIBO, Aklan—Ginkondena ni Kagawad Emily Rentino it Brgy. Cupang, Banga ro maanomalyang paggamit it pondo it andang Punong Barangay.
Raya hay matapos nga madiskubrehan ro pilang transaksyon ni Kapitan Riza Relojo nga naga-abot it P939,000.
Suno kay Kagawad Rentino nga unang nag-eupok ro isyu ko Disyembre 28, 2021 matapos nga magtuhaw ro mga istorya angot sa ginapgguwa nga P320,000 nga pondo ni Kapitan Relojo.
Napamatud-an sigon raya pinaagi sa gin-isyu nga bank statement it accounting office kaibahan ro iba pang transaksyon.
Ro mga proyekto sigon nga ginproponer it opisyal hay owa nakabaehag sa actual plan it barangay ag owa it allocated budget.
Ginpahayag pa kara nga ro actual nanda nga proyekto ko nagtaliwan nga dag-on hay ro pagpurchase it eugta nga pagapatindugan it day care center ag barangay hall apang owa raya nasunod.
Ginkwestiyon man ni Kagawad Rentino kung paano nakapagguwa it kwarta si kapitana bangud owa man it maskin sambilog nga nagtuhaw nga proyekto sa andang barangay.
Klaro sigon nga pag-eabag raya sa laye ag dapat nga mapahalin sa pwesto ro mga tawo nga eakot sa anomaliya.
Sa makaron, pagahueaton sigon nanda ro resulta it pagahimuon nga imbestigasyon it Commission on Audit (COA).
Sa pihak nga parte, todo-depensa man si Lourdes Zambrona, Barangay Treasurer it nasambit nga barangay matapos nga maeakip ro anang pangaean sa isyu.
Suno kana, gina-ubra eamang nana ro anang trabaho kamana man nga ginapilit imaw ni kapitan nga mag-isyu it voucher para sa pag-encash it kwarta.
Owa sigon imaw it kahilabtanan sa mga ginpatigayun nga transaksyon kamana man nga owa imaw it ideya kung siin gindaea ro pondo.
