KALIBO, Aklan—Padayun nga naga-inabu ro numero it mga residente sa Barangay Cupang, Banga nga nagapanawagan nga magpanaog eon sa pwesto si Punong Barangay Riza Relojo bangud sa isyu it gina-alegar nga pag-waldas sa pondo it barangay.
Nasayuran nga kaabuan sa mga residente nga nagpirma sa petisyon hay ro nagbutang man sa pwesto ukon dating tagasuporta ni kapitana.
Sa kabilugan nga masobra sa 500 nga registered voters sa lugar, naga abot sa 236 ro nagpirma bangud sa gina-alegar nga malversation of public funds ag abuse of authority.
Suno kay Ramil Leyson, dating tagasuporta ni Relojo nga bangud sa natabu hay apektado ro benepisyo it mga opisyal ag tawuhan it barangay kamana man ro budget para sa mga pumueuyu nga nagakinahangean.
Gintumod kara ro anang unga nga SK chairman sa lugar nga owa nakabaton it bonus ko Disyembre ag sweldo.
Samtang, nagapati sanda nga owa it kahilabtanan si barangay treasurer Lourdes Zambrona sa anomaliya.
Samtang, maskin ro mga senior citizens ag mga persons with disabilities ukon PWDs hay naga-reklamo eon sa delay nga pagbaton it andang mga ayuda.
Suno kay Betty Garcia nga maskin ro andang ginabayad nga monthly dues it mga senior citizens hay ginkulembat.
Samtang, gindugang man ni Jennifer Revesente nga masyado man sigon nga madumot si kapitana bangud ro mga nagakontra kana hay owa ginataw-an it ayuda halin sa LGU sa pagpanaeasa it kalamidad ukon maskin ro andang gina-request nga papeles partikular ro certificate of indigency.
