KALIBO, Aklan—Posibleng magapangatubang sa kasong Physical Injury ro sangka eaeaki matapos nga ginparakoe kara ro anang manak nga babaye sa Purok 6, Brgy. Pinamuk-an, New Washington.
Ginreklamo it biktimang 15-anyos nga dalagita ro anang stepfather nga tubong Bataan apang presenteng naga-istar sa nasambit nga lugar matapos nga imaw ro napagbalingan kasunod it diskusyon nga nag-eontad sa tunga it anang nanay ag live-in partner kara.
Base sa report, nag-uli sa andang panimaeay nga una sa idaeom it impluwensya it aeak ro suspek nga nagresulta sa mainitan nga diskusyon sa tunga ko nanay it dalagita.
Dikara eon sigon nagbueo it parakoe ro suspek ag ginparakoe sa biktima nga naninahan man sa anang siki.
Maswerte eamang sigon ag bukon man it grabe ro lastro nga naangkon it biktima.
Matapos ro insidente hay insigidang nagpaeagyo ro suspek apang natigayon man raya nga nadakpan pagkaagahon ag una eon makaron sa kustudiya it New Washington PNP para sa nagakaigong disposisyon.
