KALIBO, Aklan—Ginkasugtanan it Federation of Kalibo Tricycle Operators and Drivers Association Inc. ukon FOKTODAI nga sundon gihapon ro andang taripa apisar nga ginpasugtan eon ro 100 percent ukon full seating capacity sa mga pampublikong saeakyan.
Suno kay FOKTODAI President Johnny Damian raya ro andang nakasugtanan matapos ro ginpatigayun nga pueong kaibahan si Kalibo Sangguniang Bayan member Matt Aaron Guzman nga Chairman it Committee on Transportation.
Suno kana, ginkalipay nanda ro ginhimo nga paghaeuga it gobyerno apang indi pa sigon nanda masigurado kun makabawi eon sanda sa epekto it pandemya eabi pa ag padayun ro pagtinaas it presyo it gasolina.
Nagaeaum si Damian nga maibalik eon ro face to face classes sa tanan nga lebel bangud nagapabilin gihapon nga sangkiri ro numero it mga pasahero.
Magatao sigon sanda it voluntary discount sa pasahero engkaso nga magsobra sa lima ro andang sakay.
Apang, indi sigon sanda magsugot nga bawasan ro presenteng taripa bangud owa eon sanda it mai-uli nga para sa andang natungdan nga pamilya.
