BUSINESS News —- Gin-aprubahan eon it panel it House of Representatives nga nagtalakay sa energy issues ko Martes ro pag-amyenda sa Oil Deregulation Law sa tunga it sunod-sunod nga pagtaas it presyo it produktong petrolyo .
Gin engganyo man it House Committee on Energy si Pangueong Rodrigo Duterte nga magpatigayon it special session agud nga talakayon ro probelema.
Nagpatigayon si Committee Chairman Rep. Juan Miguel Arroyo it hearing kaibahan ro pilang committee members nga nagapabor sa substitution bill, subject sa form and style, nga maga-amyenda sa Downstream Oil Industry Deregulation Act of 1998.
Sa pihak kara, naga-oponer ro mga oil company sa pilang amendments it Kongreso sa Oil Deregulation Law.
Kaibahan eon kara ro unbundling it presyo ag probisyon nga naga-mandu sa refiners, importers ag bulk distributors nga ipabilin ro minimum inventory requirement sa sueod it 30 diyas.
Ginpamilit ni Fernando Martinez, Pangueo it Independent Philippine Petroleum Companies Association (IPPCA) nga bukon it solusyon ro price unbundling agud nga mabawasan ro lokal nga presyo it oil products.
Magkaiba sigon ro kantidad it ginagastos it mga oil company depende sa lugar rason nga nagabag-o ro presyo it andang mga produkto.
Kaibahan sa ginatumod ni Martinez nga rason it price distortion hay ro distansya halin sa sangka fuel depot sa retail location, real estate cost ag gastos sa permits.
Samtang, ginpahayag man ni Phoenix Petroleum Philippines Senior Vice-President Raymond Zorrilla nga maskin nga owa pa nanda nakita ro kopya it substitute bill sa Kamara nga naga-amyenda sa Oil Deregulation Law, padayun ro andang pagsunod sa laye.
