KALIBO, Aklan—Gin-anunsyo it Land Transportation Office ukon LTO-Aklan nga maabu eon nga mga motorista sa Aklan ro naga-avail it bag-ong 10-year driver’s license.
Suno kay Engr. Marlon Velez, hepe it LTO-Aklan nga makaron nga dag-on ro renewal it mga dating lisensiya nga maga-expire nga may limang dag-on nga validity.
Ginpahayag pa nga nagatanyag ro andang taeatapan it libreng comprehensive driver’s education program bilang mandato it bag-ong laye.
Kaundan sigon it CDE ro mga module nga nagatuyo nga ipadumdum sa mga driver nga kinahangean nanda nga ipabilin nga eowas ro karsada para sa tanan.
Kinahang-ean sigon nga tun-an it driver nga maga-renew it andang lisensya ro nasambit nga CDE modules ag makapasar sa evaluation test agud nga makabo-oe it andang CDE certificate of completion, nga kinahangean sa license renewal.
Libre suno kana ro nasambit nga CDE materials ag evaluation test sa LTO Land Transportation Management System portal ukon portal@lto.gov.ph.// pwede man raya nga i-download halin sa lto.gov.ph.
Magkaiba sigon ro CDE ag ro driver’s education module para sa mga student drivers ag bag-ong aplikante it lisensya.
Sa pihak nga parte, gindugang pa ni Engr. Velez nga sigidas man ro andang ginapatigayon nga road side inspection agud nga masiguro nga ro tanan nga mga motorista hay naga-angkon it drivers license ag rehistro it andang mga saeakyan.
Sa idaeum it RA 10930 , ginamanduan sigon ro LTO nga siguraduhon nga ro tanan nga mga naga-maneho hay may nasayuran sa traffic laws ag safe driving practices agud nga mabawasan ro pagkamatay ag kahalitan tuga it mga aksidente sa daeanon.
Samtang, kaibahan pa sa andang gina inspection ro mga pasahero nga nagasuksok it face mask kamana man ro mga saeakyan nga nagapatigayon it illegal parking eabi eon sa mga national highway.
