KALIBO, Aklan–Sangka senior citizen ro nagdangop sa Bombo Radyo agud nga ireklamo ro sangka mabahoe nga kompaniya matapos nga hasta sa makaron hay owa imaw nabayaran sa ginpatindog nga poste sa eugta nga anang ginapanag-iyahan sa Brgy. Sibalew, Banga.
Suno sa tagreklamo nga si Manuel Nabor nga tatlong poste ro ginpatindog sa anang eugta ag ginpromisahan nga pagabayaran masobra sa daywang dag-on eon ro nagtaliwan.
Nagpirma pa sigon imaw it kasugtanan kay engr. daguman apang owa eon raya nakabalik.
Imbes nga 3,000 pesos kapareho sa ginbayad sa iba pang land owners nga ginpatindugan man it poste , gusto nana nga 25,000 pesos ro ibayad kana.
Gina-insister pa nana nga kon indi matuman ro anang demand hay mas mayad nga boe-on ukon i-pull-out eon lang it nasambit nga kompaniya ro andang poste.
Ginasugid nga ro ginpatindog nga mga poste hay kaparte it gina-construct nga Timbaban Hydroelectric Power Plant.
Sa owa it swerte suno kana hay indi eon nana ma-contact ro naka-transaksyon nga si Engr. Daguman.
