KALIBO, Aklan–Ginkumpirma it Land Transportation Franchising and Regulatory Board (LTFRB) nga nakabatun eun sanda it soft copy it resolution maghalin sa Commission on Elections ukon Comelec nga nagapahayag it exemption sa election ban ro pagpaguwa it taeatapan it budget para sa ginapanudpod nga fuel subsidy para sa mga driver’s it pampublikong saeakyan nga naapektuhan it grabe nga pagtinaas it presyo it mga produktong petrolyo.
Suno kay Atty. Jun Altura, tagapaghambae it LTFRB 6 nga sa makarun hay gin-resume eun it taeatapan ro pagpanudpod it nasambitan nga ayuda para sa mga kwalipikadong driver’s.
Sa probinsya it Aklan, hay ginahueat pa sigon it Land bank kalibo nga makabo-oe it go signal sa andang central office.
Kung matabo anuman nga oras umpisa makarun nga adlaw hay puwedi eun nga mabo-oe it mga kwalikadong driver’s ro andang ‘pasada cards’.
Sa makarun nga tranche sigon hay ro ginapili eamang nga makabatun it ayuda hay ro mga jeepney ag van driver’s.
Ro nasambitan nga ‘pasada cards’ hay nakapangaean sa mga operators nga dapat hay itao man nanda sa mga drivers kung raya hay magpakarga it gasolina sa andang ginabiyahe nga saeakyan.
Nasayuran nga kapin sa P7,200 ro ginataea nga ayuda para sa mga driver’s.
Ginklaro pa kara nga ro ginapanudpod nga fuel subsidy hay nakataeana eamang sa gasolina ag indi puwedi mga gamiton sa ibang bagay.
