SPORTS News —- Nagtueumpok sa guwa it andang baeay sa Minglanilla, Cebu kahapon, Good Friday ro mga fans it sikat nga volleyball player nga si Deanna Wong.
Suno kay Judin Alvizo-Wong, ina it Choco Mucho player nga maga-agto kunta sanda sa simbahan, apang nabudlayan nga makaguwa bangud sa nakapila nga mga tagasuporta it anang unga sa guwa it andang gate.
Ginasugid nga pila sa mga fans hay naghalin sa Mindanao ag iba pang parte it Visayas, kun sa siin pila sa mga raya hay alas-6:00 pa eamang it agahon hay nakabantay eon.
Mas pang naghinugyaw ro anang mga fans kat magguwa ag nag-wave si Deanna kanda.
Ko nagtaliwan nga domingo, ginpakigbahin ni Deanna sa anang social media ro pagbukas it sari-sari store it anang pamilya kasunod it andang hardware.
Ro post hay naging viral ag pilag mga fans ro nag-agto sa andang baraka sa pageaum nga makita ro presensiya it nasambit nga volleyball star.
Naging fan favorite si Deanna bangud nga kaeabanan nga naga-trending imaw sa social media sa andang mga hampang eabi eon sa bag-o eamang natapos nga Premier Volleyball League Open Conference, kun sa siin ro Choco Mucho hay nag-fourth place matapos nga pierdihon it sister team nga Creamline sa semifinals.
Nasayuran nga ro 24-anyos nga si Deanna hay kaparte kunta it Philippine women’s volleyball team para sa paeaabuton nga 31st Southeast Asian Games sa Hanoi, Vietnam apang ginbuslan it back-up setter it Creamline nga si Kyle Negrito paagto sa Brazil para sa training camp tuga it anang shin injury.
