KALIBO, Aklan–Pursigido ro Aklanon boxer nga si Delmar Pellio, tumandok it Alimbo Baybay sa banwa it Nabas nga magdaog agud nga mataw-an it dungog ro probinsiya it Aklan ag makaangkon it sambilog nga ginakilaeang professional boxer.
Sa interview it Bombo Radyo, ginpahayag ni Pellio nga haum eon imaw nga uman nga magbalik sa ibabaw it ring hin-aga nga adlaw it Sabado, Abril 23 bandang alas 2 it happon, Philippine time, agud nga maka-atubang ro Vietnamese nga si Dinh Hong Quan para sa bakanteng IBF asia lightweight championship sa Ho Tram Casino sa Vietnam.
Naging sensiro suno kana ro anang training sa sangka gym sa las piñas bangud nga kilaeang mayad man nga boxer ro anang kaengkwentru.
Si Pellio hay may 9 wins, 1, loss ag 4KO’s samtang si Dinh hay may 7-1 nga record.
Ginsaysay it boksidor nga nakitaan imaw it potensiyal sa anang career matapos nga makabakbakan ko disyembre ro Olympian nga si Charly Suarez.
Maskin sigon ro naka-sparring it southpaw nga si Pellio hay nagadayaw sa anang kadasig ag kamayad kamana man sa anang estilo sa boksing.
Maskin sigon nga napierde imaw kay Suarez apang maabu ro anang natun-an nga leksyon ag mas pang kilaea sa patag it boxing.
Raya sigon ro anang kauna-unahan nga pagsabak sa international fight nga may titled belt.
Mag-eowas kana, daywa pang pinoy boxer ro makaibahan sa main event nga magasabat sa WBO Asia.
