NATIONAL News —- Ro mga empleyado it pribadong sektor nga magasueod sa trabaho sa adlaw it eleksyon hay makabaton it dugang nga 30% sa andang daily pay, suno kay Labor Secretary Silvestre Bello III.
Raya hay matapos nga ginpaguwa ni Pangueong Rodrigo Duterte ro Proclamation No. 1357 nga nagadeklara sa Mayo 9, 2022, bilang sangka special non-working holiday.
Ginpaguwa it DOLE ro pay rule bilang giya sa mga employer ag mga worker.
Para sa pagtrabaho sa special non-working holiday, makakabo-oe ro empleyado it additional nga 30% it anang daily rate para sa unang waeong oras it trabaho.
Para sa pagtrabaho it masobra sa wawong oras ukon overtime work, makakabo-oe ro empleyado it dugang nga 30% it anang hourly rate sa nasambit nga adlaw.
Kun ro empleyado hay magatrabaho sa special holiday nga magapatak man sa adlaw it anang rest day ukon day-off, imaw hay pagabayaran it dugang nga 50% it anang daily rate sa unang waeong oras it trabaho.
Para man sa overtime work sa special holiday nga magapatak man sa rest day ukon day-off it empleyado, pagataw-an imaw it dugang nga 30% it anang hourly rate sa nasambit nga adlaw.
Samtang, ginpadumdum man it DOLE ro ‘no work, no pay policy’ nga iga-implementa makaron nga adlaw.
Base sa Proclamation No. 1357, gindeklara ni Pangueong Duterte ro May 9 bilang special non-working holiday agud nga mataw-an it kahigayunan ro publiko nga gamiton ro andang kinamatarung sa pagboto sa national and local elections.
