KALIBO, Aklan—Nagpaabot it pagpasaeamat si incumbent Kalibo vice mayor Cynthia Dela Cruz sa suporta it mga taga-banwa it Kalibo sa uman nga pagbutang kana sa pwesto kamana man sa back-to-back victory nanda it anang ka-tandem nga si 1st district board member Juris Sucro.
Ginpasiguro ni Dela Cruz nga insigida sanda nga magatrabaho bilang pagtuman sa mga ginpromisa kara sa mga residente sa idaeum it andang ginbilog nga konsepto nga “new kalibo”.
Prayoridad sigon nanda ro pagpabaskog sa programa sa ikamayad nga eawas sa tunga it ginapangatubang nga pandemya tuga it COVID 19 kamana man ro clean-up drive sa mga nagapangunang daeanon.
Ginapanan-aw kara nga magiging mayad ro andang team up it ka-tandem kun sa siin imaw magatutuk sa administrative ag legislative side samtang si Sucro hay sa mga bag-ong proyekto, funding, mga bag-ong ideya ag iba pa.
Gusto man nana nga maayos eon ro mga naaprubahan nga proyekto para sa Kalibo public market , slaughter house, basurahan ag dugang nga mga karsada sa barangay sa idaeum it medium term projects samtang sa long term hay ro pagtukod it mga hospital , community college ag dugang nga iba pa.
Plano man nana nga makaangkon it meeting kada buean ro executive ag legislative para sa tayuyon nga mga proyekto.
