KALIBO, Aklan—Ginaeauman nga magiging smooth ro transition it 18th sangguniang panlalawigan paadto sa 19th sangguniang panlalawigan members matapos nga gindomina it grupong Tibyog Akean ro mga nailihir nga kandidato sa tagsa ka posisyon sa provincial level.
Suno kay Merlyn Montaño, acting secretary it SP Aklan, may igapatigayon nga send off ceremony sa mga miyembro it 18th SP nga natapos eon ro andang termino kon sa siin ro mga magapabilin eon lang sa 19th SP hay si Vice Gov. Atty. Reynaldo “Boy” Quimpo ag ro daywang ka SP members nga sanday Jay Tejada ag Nemesio Neron nga nailihir it uman sa bag-o eamang natapos nga eleksyon.
Ro waeong miyembro hay sanda man ro mga nagdaeaog sa nagtaliwan nga botohan kon sa siin sa daywang distrito it Aklan hay puro magkaalyado.
May inaugural ceremony nga igapatigayon para sa mga bag-ong miyembro it 19th SP.
Kaeakip sa aktibidad ro breifing ag orientation sa mga miyembro kaibahan ro andang mga staff.
Nasayuran nga natapos eon ro termino nanday Soviet Russia Dela Cruz, Nelso Santamaria, Esel Flores, Ramon Gelito, Atty. Harry Sucgang ag Atty. Emmanuel Sodusta.
Samtang sa pihak nga parte, balik eon man sa normal ro operasyon it andang taeatapan matapos nga naging masako sanda ko pilang adlaw bangud sa eleksyon hasta sa proklamasyon it mga nagdaeaog nga kandidato.
