KALIBO, Aklan–Nagabakaeaka ro mga mangingisda sa probinsiya it aklan sa posibilidad nga indi eon makabaton it 3,000 pesos nga fuel subsidy bilang ayuda sa tunga it padayun nga pagtaas it presyo it krudo.
Suno kay Pancho Tayco, sangka mangingisda ag nagapanag-iya it baroto sa barangay New Buswang, Kalibo nga matapos nga maabutan it election banning ro pag-release it nasambit nga pondo hay posibleng uman nga mapurnada sa pagbaylo it administrasyon.
Nagpaabot eon man sigon sanda it request sa Bureau of Fisheries and Aquatic Resources ukon BFAR nga itau eon ro nasambit nga bulig pinansiyal.
Ginpahayag dugang nga haeos 50% it andang gastos sa operasyon hay nakataeana sa petrolyo rason nga maabu sa anang mga kaibahan nga mangingisda ro naga-aray eon samtang ro iba hay napilitan nga magpundo sa pagpa-eawod ag nag-usoy eon lang it ibang trabaho bangud sa kamahae it krudo.
Mag-eowas kara, ginlimitahan man nanda ro andang pagpanagat it sang beses sa sang domingo, apang nagatinir it haeos daywang gabi-i sa eawod agud nga makabawi sa gastos.
Samtang, aminado imaw nga mabahoe nga bulig sa mga kapareho nanda nga mangingisda ro subsidy agud nga mapahagan-hagan ro epekto it owa it preno nga oil price increase.
