KALIBO, Aklan–Gin-engganyo it sangka HIV-AIDS advocate ro mga pumueoyo nga magpa-test eabi eon ro mga nakaangkon it sexual contact para masayuran kung sanda hay infected it virus ukon bukon.
Nasayuran nga ginaselebrar kada ikatlong dominggo it Mayo ro International AIDS Candlelight Memorial.
Raya hay sangka manami nga oportunidad para magbuylog sa away kontra HIV, magpakita it suporta sa mga biktima it baeatian ag dumdumon ro mga tawong nagtaliwan bangud sa AIDS-related illness.
Suno kay HIV-AIDS advocate Errol Ordines, maabu eon nga mga testing facility nga gintukod sa probinsya it Aklan para magpatigayun it HIV test kamana man nga may gintraining sanda nga field navigators para magpatigayun it rapid test.
Ro Human Immunodeficiency Virus ukon HIV hay sangka klase it virus nga nagakalhit sa dugo nga naga-atake ag naga-pahina sa immune system it sangka tawo.
Kung magbuhay ag mag-grabe ro kondisyon hay sarang kara nga samaron ro maabu nga cells sa eawas kung siin nabudlayan raya nga protektahan ro kaugalingon halin sa nagkaeain-eain nga mga baeatian ag impeksyon.
Partikular nga gina-atake it virus ro CD4 cells ukon ginatawag nga T cells nga kaparte it immune system.
Owa it cure ukon epektibong bueong kontra sa HIV infection apang kung makaangkon it tamang medical care hay puwedeng ma-kontrol ro virus.
Kung indi maagapan ag mabueong, ro HIV virus hay posibleng mahueog sa pag-angkon it acquired immunodeficiency syndrome ukon AIDS.
Raya hay ro ‘most severe phase’ it HIV infection.
Raya hay posibleng makatapon pinaagi sa pakikipag-hieawas sa multiple partner, paggamit it dagum nga gingamit it sangka infected ag ro pagpasusu it sangka ina nga infected sa anang eapsag.
Base sa datus, umpisa ko Enero 2022 nakalista eon ro probinsya it kapin sa 375 nga mga kaso it HIV AIDS.
