KALIBO, Aklan—Nagbaton it certificate of recognition, gift packs ag kapin sa P25,000 nga cash ro ap-at ka mga centenarian halin sa provincial government it Aklan.
Suno kay Provincial Social Welfare Development Office ukon PSWDO head Evangelina Gallega, mag-eowas sa P100,000 nga mabaton it mga raya halin sa national government hay may ginata-o man ro gobyerno probinsyal bilang pagkilaea sa andang maeawig nga pagkabuhi sa ibabaw it kalibutan.
Ginbaton it mga identified centenarian nga sanday Paula B. Dela Cruz, 100 anyos it Brgy. Nalook, Kalibo; Jose C. Quintin, 101 anyos it Brgy. Cubay Sur, Malay; Sinceridad I. Isuga, 100 anyos it Poblacion, Malinao ag Ma. Soledad Y. Infante, 100 anyos it Brgy. Kinalangay Nuevo, Malinao ro nasambit nga kantidad pinaagi man sa Centenarian Program sa idaeom it Senior Citizens 0.5% Special Purpose Appropriation.
Ro nasambit nga mga centenarian hay ginkilaea pinaagi sa mga ginvalidate nga dokumento it mga raya partikular ro andang birth certificate nga nagapamatuod nga masobra sa 100 anyos eon sanda nga nagakabuhi sa ibabaw it kalibutan.
