KALIBO, Aklan—Sunod-sunod eon ro mga domestic operations sa Kalibo international airport.
Suno kay Engr. Eusebio Monserate, Jr. manager it Civil Aviation Authority of the Philippines ukon CAAP-Aklan, naga average makaron it pitong flights kada adlaw ro paeuparan, kun sa siin puro punuan ro mga eroplano nga naga-abot ag nagaguwa.
Mag-eowas kara, may kahigayunan sigon nga naga-extend sanda it operasyon bangud sa mga request nga extra flight partikular it cebu pacific rason nga alas-3 pa eamang it aga-aga hay bukas eon ro paeuparan.
Sa baylo nga 6:00 am to 6:00 pm ro andang operasyon hay gin extend raya hasta alas 10 it gabi-i ag kon amat hay may nagahugpa it ala-1:00 it aga-aga.
Bangud suno kana sa paghaeuga sa mga restrictions rason nga uman nga nagbalik ro kapagsik it aviation industry.
Gindugang pa ni engr monserate nga sa Hunyo 1 hay posibleng ibalik sa 24/7 ro operasyon it Kalibo airport.
Nasayuran nga ko pre-pandemic , naga-average ro paeuparan it 10 nga domestic flights ag 30 nga international flights kada adlaw.
