KALIBO, Aklan—Ginkumpirma ni punong barangay Ledwino Roselo it Badiangan, Banga nga nagka-atubang ag nagkasugot eon dati ro tagreklamo nga si Valentin Sison ag ro ginareklamong si Cherrel Tapican sa andang barangay hall.
Base sa nakasugtanan, ginpromisa ni Tapican nga sa maabot nga Hulyo 1 hay igabalik nana kay Sison ro kantidad nga P170,000 halin sa P228,500 nga kabilugan nga kwartang gintau it tagreklamo para sa igapatindog kunta nga micro-gasoline station.
Ro nasambit nga kantidad eon lang sigon ro pwedeng maibalik bangud nga indi eon mai-refund ro mga gingastos kara sa mga ginlakad nga mga papeles.
Nagpasugot man sigon si Tapican nga itau ro mga papeles ag mga resebo nga ginapangayo ni Sison sa pagproseso it nasambit nga negosyo.
Ginklaru man ni kapitan Roselo nga nagpangayo ag gintaw-an nanda it certificate to file action si Sison matapos nga owa nagsipot si Tapican sa ikaywang kahigayunan nga pagpatawag kanda it barangay.
Pagahueaton eon lang sigon kon ano ro maging desisyon it magtimbang nga parte sa maabot nga Hulyo 1.
