KALIBO, Aklan—Umpisa ko Hunyo 1 hay uman nga ginbalik ro 24 oras nga operasyon it Kalibo International Airport.
Suno kay Engr. Eusebio Monserate, Jr. manager it Civil Aviation Authority of the Philippines ukon CAAP-Aklan nga raya hay bilang preparasyon sa pag-inabu it mga flights kamana man ro pagbalik it commercial flights halin sa Korea.
Bangud sa nasambit nga tikang suno kana hay pilang mga airline companies ro naengganyo nga magbalik operasyon sa paeuparan.
Sa kamatuoran suno kana nga may nabaton eon sanda nga mga proposal para sa posibleng flight sa Kalibo airport matapos nga masayuran nga bukon eon it limitado ro oras it andang operasyon.
Samtang, ginkumpirma ni Engr. Monserate nga magapatigayon eon it flights halin sa Incheon South Korea paagto sa Kalibo airport ro T’way Airlines sa June 17 nga may daywang flights kada domingo samtang maga-umpisa ro unang flight it Air Seoul Airlines sa June 22 nga may ap-at nga flights per week.
Ginaeauman nga kapin sa 200 nga turistang Koreano ro sakay it kada flight halin sa daywang nasambit nga airline companies.
Sa pihak nga parte, kaibahan gihapon sa ginapatuman nga health and safety protocol sa paeuparan ro pagsuksok it face mask ag pagpatuman it physical distancing kontra COVID-19.
