KALIBO, Aklan–Batyag eon it mga panaderya ro epekto it padayun nga pagtinaas it mga baeak-eon ag petrolyo.
Suno kay Larcen Dante, in-charge sa sangka bakery sa banwa it Kalibo nga ginatamaan kara ro andang delivery service kamana man ro mga sangkap nga gamit sa andang negosyo nga kaeabanan nga nagahalin sa ibang lugar.
Owa eon sigon sanda nagapataas it presyo kundi nga ginabawasan eon lang ro gramo it mga ginabaligya nga tinapay.
Samtang, mabahoe suno kana ro andang pagpasaeamat sa ibang mga customer nga naka-eubot sa sitwasyon sa medyu pag-isot it andang baligya nga tinapay.
Haeos tanan sigon hay nagmahae eon kaeakip ro LPG, harina nga nagapangunang sangkap it andang produkto, kamana man ro margarine, gatas, asukar ag iba pa.
Sa pihak kara, owa suno kana it plano ro andang management nga magbawas it tawuhan bangud sa mataas nga demand it andang produkto nga ro iba hay gina-deliver sa metro manila, antique ag iba pang lugar.
Nasayuran nga haeos tatlong buean eon ro bakbakan sa tunga it Russia ag Ukraine nga nagtuga it owa it untat nga pagtaas it mga baeak-eon ag produktong petrolyo.
Sa makaron hay owa pa it kasiguraduhan kon hin-uno matapos ro giyera.
