KALIBO, Aklan—Ginpasidunggan it Sangguniang Panlalawigan it Aklan ro sangka Aklanon athlete kasunod it pag-uli kara it bronze medal para sa Pilipinas sa hampang nga Men’s Combat 60kg Class Of Muay Thai Competition sa ginpatigayon nga 31st Southeast Asian Games sa Hanoi, Vietnam.
Ginbaton ni Fritz Aldin Biagtan, tumandok it Brgy. Camanci, Batan ro resolution of commendation nga ginsponsored ni Aklan second district board member Jay Tejada bilang pagkilaea man sa anang kamayad.
Suno kay Biagtan, eubus ro anang pagpasaeamat sa anang pamilya sa uwa it sawa nga suporta nga ginapatungod kana sa kada may hampang raya.
Ro medalya suno kana hay uwa ginapueot kundi ginapangabudlayan rason nga grabeng pagpahaom ag ensayo ro anang ginhimo antes ro hampang.
Ro anang kadaeag-an hay bukon eamang it para sa anang kaugalingon kundi para man sa mga Pilipino.
Nasayuran nga ro hampang nga Muay Thai hay nag-originate sa nasyon it Thailand.
Si Biagtan hay nagkahilig sa nasambit nga hampang sa edad nga 12-anyos hasta nga nakapasakop sa SEA Games.
