KALIBO, Aklan–Ginpaathag it pamunuan it Municipal Disaster Risk Reduction and Management Office (MDRRMO)-Kalibo nga posibleng temporaryo nga maapektuhan ro andang operasyon umpisa Hulyo 1 bangud sa pagbaylo it administrasyon it lokal nga gobyerno.
Suno kay MDRRMO-Kalibo Head Terrence Toriano nga pila sa andang personnel hay magatapos eon ro kontrata sa Hunyo 30.
Buot hambaeon kara, posibleng magahire ro LGU it mga bag-ong personnel para pun-an ro kakueangan.
Aminado si Toriano nga mabahoe ro epekto kara sa operation ag response it taeatapan.
Ro listahan sigon it mga requirements para sa hiring it mga personnel hay anda eon man nga ginpadaea.
Apang, indi man sigon nanda pwedeng insigidang i-deploy ro mga ma-hire nga bag-ong personnel bangud kinahang-ean pa raya nga ipaidaeom sa pilang dominggong training.
Ginpahayag pa ni Toriano nga magapagguwa sanda it abiso sa mga maabot nga inadlaw angot sa temporaryong pagpundo it andang 24 oras nga operasyon umpisa Hulyo 1 bangud sa kakueangan it tawuhan.
Posible sigon nga magabuhay raya it hasta daywang dominggo.
