KALIBO, Aklan–Nakatutok makaron ro Provincial Health Office (PHO)-Aklan sa mga nailistang kaso it dengue eabi pa ag may namonitor sanda nga clustering it mga kaso sa pilang kabarangayan.
Umpisa Enero 1 hasta Hunyo 2022, nakalista ro taeatapan it kapin sa 112 nga kaso it dengue sa bilog nga probinsya.
Suno kay Dr. Cornelio Cuachon Jr. nga 300 percent raya nga mas mataas kumpara sa nailistang kaso ko nagtaliwan nga dag-on nga naga-abot eamang sa 52 cases.
Ro banwa sigon it Ibajay ro nakalista it pinakamataas nga kaso nga 23 kung siin ginsundan raya it Malay nga may 20 nga kaso; 17 sa Kalibo; 11 sa Nabas; pito sa Numancia; an-om sa Banga; tig limang kaso halin sa Buruanga ag Lezo; tig ap-at nga kaso halin sa Balete ag Makato; tig tatlong kaso sa Malinao ag Tangalan; daywa sa Libacao ag tig sambilog sa Batan ag New Washington.
Ginapahayag nga daywa eon ro napabalita nga namatay nga maghalin sa Banga ag Numancia.
Kaeabanan sigon sa mga nailistang kaso hay halin sa edad sang dag-on hasta 10 dag-on.
Ginklaro man ni Dr. Cuachon nga owa sanda it ginapasaka nga alert level system apang ginaeauman eon nanda ro pag-angkon it outbreak.
Ulihing nakaangkon it dengue outbreak ro Aklan ko 2019 matapos nga makalista it masobra 5,000 nga kaso kung siin 23 ro namatay.
Ginlaygayan man kara ro mga pumueoyo nga ipabilin ro kalimpyo sa sueod ag guwa it baeay.
Siguraduhon nga regular nga limpyuhan ro mga lugar nga posibleng istaran it namok para makalikaw sa dengue.
Engkaso nga makabatyag it pilang ka mga sintomas mas mayad nga insigidang magpakonsulta sa pinakamaeapit nga klinika agud nga matan-aw it doktor antes mag-grabe ro kondisyon.
