KALIBO, Aklan—Naka alerto ro Philippine Coast Guard ukon PCG-Aklan sa selebrasyon it kapiestahan ni San Juan de Bautista sa maabot nga Hunyo 24.
Suno kay Dominador Salvino, deputy station commander for operations it PCG-Aklan nga ginaeauman eon ro pagbuhos it mga turista sa isla it Boracay kamana man sa mga coastal areas sa mainland Aklan.
Angot kara, may mga nakaplastar eon sigon sanda nga deployment plan kabulig ro mga natungdan nga ahensiya it gobyerno agud nga masiguro ro kaeowasan it mga turista.
Uman nga nagpadumdum ro PCG sa mga nagaplano nga magpaligos sa dagat ag magapatigayon it iba pang aktibidad nga mag doble dahan ag bantayan it husto ro mga inunga.
Pagatutukan sigon nanda ro mga matawong lugar sa isla partikular sa front beach kun sa siin magadugang it augmentation nga magabantay bangud sa naexperiensiyahan nga amihan.
Sa makaron hay may una man sanda nga mga floating asset nga pagamiton sa sea borne patrol sa mga nagapatigayon it island hopping ag iba pang water activities.
May gintaeana man sigon sanda nga deployable response group nga maglibot sa mga baybayon sa andang area of responsibility ag sa palibot it Boracay.
Samtang, hugut man sigon nanda nga pagatutukan ro implementasyon it health and safety protocols partikular ro pagsuksok it face mask ag physical distancing.
