KALIBO, Aklan—Haeos fully booked eon ro pilang mga cottages sa banwa it Kalibo, Numancia ag iba pang mga banwa nga may mga beaches para sa selebrasyon it kapiestahan ni Sr. San Juan de Bautista, hin-aga nga adlaw it Biyernes, Hunyo 24.
Suno kay Rogelio Tomagtang III, tag-ana it cottages sa Lambingan beach nga umpisa ko Lunes nga adlaw hay may mga nagbo-oe eon it reservations ukon early booking.
Bangud sa paghaeuga it mga restrictions sa tunga it covid 19 pandemic, mabahoe ro andang pagpasaeamat nga makabawi sa haeos daywang dag-on nga pagkatengga it andang negosyo.
Ginpahayag nga pila sa mga nagpa-reserve it cottage hay ro mga indibidwal nga planong makisadya sa beach party sa kaiping nga Pook jetty port kun sa siin imbitado ro bandang siakol nga gin-organisa ni incoming Kalibo mayor Juris Sucro.
Mag-eowas sa cottage, nagaparenta man sanda it set it bangko ag lamesa nga owa it pandong nga sarang maka-accommodate it 12 nga katawo nga igabutang sa beach front nga nagabalor it P350 hasta P400.
Ro renta it kada mabahoe nga cottage nga pwede ro hasta 24 nga katawo hay naga-abot sa P700 apang ro maisot hay P500.
Kadungan kara, nag apela ro negosyante nga bantayan ro mga inunga nga nagapaligos kamana man nga indi magpahilong it mayad agud nga ro masadya nga selebrasyon hay magapadayun hasta nga maka-uli sa andang natungdan nga mga baeay.
