KALIBO, Aklan—Kadungan it inagurasyon ni Pangueong Ferdinand “Bongbong” Marcos Jr., naghimo it maeapnagon nga rally sa bilog nga nasyon ro grupong SAMBAYAN kon siin kaparte kara ro grupo man nga NAPOCACIA sa lokal nga level.
Ginpahayag ni Mr. German Baltazar, presidente it grupong NAPOCACIA, ro andang ginpatigayon nga aktibidad hay bilang pagsug-aeaw sa bag-ong pungko nga presidente ag ro pagpakita it suporta sa anang administrasyon.
Apang, nahaluan raya it tensyon sa tunga it grupong Bayan Aklan kon siin gin-akusahan sanda nga ro andang miyembro hay nagbueo it pictures ag videos.
Ginklaro ni Baltazar nga una sandang ginboe-an it litrato kon siin nagbaeos eamang man sanda apang nakaangkon it tensyon kat pilit nga ginabueo ro cellphone ag ginliab ro anang miyembro it ginasugid nga miyembro man it Bayan Aklan.
Ginpamalibaran ni Baltazar ro isyu nga na brainwash sanda it mga katapo it Philippine Army bangud sa kamatuoran hay sanda ro nagpaeapit sa katapo it gobyerno kon anu ro maibulig it andang grupo.
Gin-insister pa kara nga bukon sanda it purilon ag ro anang mga miyembro hay nagahueag sa eksakto ag tama nga pamaagi.
