KALIBO, Aklan—May matawag eon nga kaugalingon ag permanenteng ilistaran ro mga katutubong ati sa banwa it Numancia.
Raya hay matapos ro ginpatigayon nga pormal nga pag-turn-over it kapin sa 26 nga unit it libreng pabaeay nga nahamtang sa Barangay Aliputos, Numancia pinaagi sa Diocesan Social Action Center it Diocese of Kalibo sa pakikipagbueuligan it Caritas Italiana sa mga recipient kara kaina it agahon.
Ro nasambit nga baeay hay daywang panaegan nga himo sa mixed materials.
Suno kay Fr. Ulysis Dalida, director it Social Action Center nga ro nasambit nga mga katutubo hay ginsaylo halin sa dating Ati community sa barangay Bulwang sa nasambit nga banwa.
Mag-eowas sa pabaeay hay may ginbutang man sa lugar nga covered court, tribal hall ag iba pang pasilidad.
Tuyo it proyekto nga mapabaskog pa ro economic and social status it Ati Community.
Ko 2015 pa sigon ginduso ro nasambit nga proyekto, apang nadelay bangud sa pilang problema partikular sa eugta nga ginpatindugan.
Nauna kara, sangka seremonya ro ginpatigayon bandang 7:30 it agahon ag misa nga ginpangunahan ni Bishop Jose Corazon Tala-oc.
Matapos ro pagturn-over it pabaeay hay pagataw-an man it pangabuhian ro mga katutubong ati sa lugar.
Angot kara, nagpaandam man ro simbahan nga bawae nga ibaligya nanda ro baeay nga gina-istaran.
Ginaeauman nga madugangan pa ro unit it nasambit nga housing project.
Samtang, naging dinapit nga bisita sa seremonya ro Department of Trade and Industry, Department of Labor and Employment ukon DOLE nga nagpromisa it livelihood project sa mga katutubo, Numancia Mayor Jeserel Templonuevo, Caritas ag iba pang organisyon.
