Ginkumpirma it Department of Agriculture-Bureau of Animal Industry (DA-BAI) nga ro pagnipis it suplay it manok sa nasyon hay bangud sa pagtaas it demand sa pagbukas it ekonomiya.
Ginpahayag ni DA-BAI Director Reildrin Morales nga nakatutok eamang ro produksyon it mga mangunguma ukon producers it manok sa lebel kun sa siin nakasarado pa ro merkado.
Dugang pa ni Morales, maskin nga owa it kaso it Avian Influenza sa mga broiler hay sambilog gihapon sa ginatan-aw nga rason it mga mangunguma hay ro trend kara rason nga owa napun-an ro produksyon it manok.
Mataas man sigon ro presyo it sabud ag produktong petrolyo bangud sa nagapadayun nga giyera sa tunga it Russia ag Ukraine nga nakakaapekto sa andang operasyon.
Sa pihak kara, nagaeaum gihapon si Morales nga magiging manami ro resulta it cycle it broiler makaron nga buean agud nga maeagas ro demand sa merkado.
Sa pihak nga parte, nagapameligro nga uman nga magtaas ro presyo it kada sambilog it itlog sa mga masunod nga mga inadlaw nga maga-abot it hasta sa 15 pesos raya ro ginpaandam it Agricultural Sector Alliance of the Philippines Incorporated (AGAP) ag Pork Producers Federation of the Philippines Incorporated (PPFPI) bangud mataas nga production cost ag mga kaso it bird flu.
