KALIBO, Aklan—Bangud sa kanami it ginakabig nga world-famous resort island sa nasyon rason nga naeakip ro Isla it Boracay sa sambilog sa pinakamanami nga lugar sa bilog nga kalibutan it Time Magazine.
Raya ro ginpahayag ni Malay Municipal Tourism Officer Felix delos Santos.
Suno kana nga gina-congratulate ag ginadayaw nana ro gin-obra nga pagtinguha it kada isaea nga nagbulig sa rehabilitasyon it Boracay nga gin-umpisahan ko 2018 nga ginpangunahan it Boracay Inter-Agency Task Force.
Nagapati si Delos Santos nga mag-eowas sa maputi ag pino nga baeas kamana man sa anang long beach, ro iba pang factor rason nga ginadagsa it mga turista ro isla hay bangud sa manami nga eksperiensiya sa product and services.
Sa makaron hay mas pa nanda nga ginapabaskog ro skills enhancement it mga tourism frontliners kapareho it mga e-trike drivers ag iba pa.
Gina-enjoy eon man sigon makaron it mga turista ro ginatanyag nga bag-ong produkto ag serbisyo kapareho it food crawl, wellness ag bicycle lane.
Ginapahaum man sigon nanda ro food tourism nga imaw ro ginaduso ni bag-ong DOT secretary Christina Garcia-Frasco eabi eon ro savor Malay ukon ro pagkaon nga ginapabugae it kada barangay it banwa it Malay agud nga mataw-an it kahigayunan ro mga turista nga masamitan ro andang cuisine.
Mabahoe nga bagay man sigon ro padayun nga pagprotekta sa kaanyag it Boracay.
Ginpahayag dugang nga maskin nga natigayon eon nga maturn-over it BIATF sa lokal nga gobyerno it Malay ro pagdumaea sa isla, ginpasiguro ni Delos Santos nga magapadayun ro rehabilitasyon partikular sa mga owa pa natapos nga mga infrastructure projects.
Samtang, ginpahayag pa ni Delos Santos nga padayun ro hugut nga pagpatuman it maximum carrying capacity sa isla nga 19,215 turista.
Suno kana nga ko unang an-um nga buean it makaron nga dag-on, nakalista it kapin sa 849,047 nga tourist arrivals kaibahan ro mga dumueuong nga turista eabi eon ro mga koreano.
Ginaeauman nga mas pang magataas ro numero it mga turistang magbabakasyon sa Boracay matapos ro uman nga pagbalik it international flights sa Kalibo International Airport ag ginhaeugaan nga travel restrictions.
