Gintalakay sa session it sangguniang bayan it Kalibo ro ginbaeay nga resolusyon ni Kalibo sb member Raymar Rebaldo angot sa pagbutang it street lights sa Tigayon circumferential road ag sa Kalibo-Lezo bridge.
Raya hay sandig man sa apela it pila ka mga motorista ag pumueoyo nga mabutangan it iwag ro lugar para sa kaeowasan it mga nagaagi.
Apang, ginkwestyon ni sb member Matt Aaron Guzman ro konseho kon angay pa nga iduso ag aprubahan ro resolusyon ni Rebaldo nga naka-address agud nga magpabulig kay Aklan first district Congressman Carlito Marquez bangud nga may ana eon nga dating naiduso nga resolusyon nga aprubado sa plenaryo ag naka-address ro request sa Department of Public Works and Highway ukon DPWH.
Sa pihak kara, ginsabat ni sb Augusto Tolentino nga uwa it saea sa panibag-ong resolusyon bangud nga pareho eamang ro tinutuyo kara.
Apang, para sa iba agud nga uwa eon it magdoble nga resolusyon hay kinahang-ean nga i-follow up ro nauna ag istudyuhan it mayad antes nga aprubahan sa plenaryo.
