KALIBO, Aklan–Ginpilahan ro ulihing adlaw it pagparehistro makaron nga adlaw it Sabado, Hulyo 23, 2022 agud nga makaboto sa Barangay ag Sanguniang Kabataan Elections sa Disyembre 5 it makaron nga dag-on.
Suno kay Jonhline Ollios, nagparehistro bilang bag-ong botante sa banwa it kalibo , alas-5:30 pa eamang it agahon hay nagpila eon imaw sa guwa it municipal election office agud nga mataw-an it tsansa nga makaboto sa maabot nga eleksyon.
Mag-eowas sa 17-anyos nga si Jonhline, maabu nga iba pa ro naghingabot para sa ulihing adlaw it voter registration kun sa siin sa mga bag-ong registrants , nataeupangdan nga kaabuan sa mga raya hay naga-edad it 15 hasta 17 anyo.
Sa pihak nga parte, kasunod it paghandum it pilang mamalidha nga suspindihon ro eleksyon, ginpahayag it bag-ong botante nga pabor imaw nga madayun ro barangay ag SK elections agud nga mabayluhan eon ro mga owa masyado naga-perform nga mga opisyal.
Mag-eowas kara, excited eon man sigon imaw nga makaboto sa unang kahigayunan.
Samtang, nagapanawagan man imaw sa gobyerno nga kabay nga madayun eon ro 100% face to face classes agud nga maibalik eon sa normal ro andang pagtinueur-an.
Mag-eowas kara, gusto nana bilang pamatan-on nga mapabaskog ro public health system sa nasyon kontra COVID 19 ag mapanaba ro pamasahe ag mga nagapangunang baeak-eon.
Kabay suno kana nga matalakay raya nga mga isyu ni Pangueong Ferdinand Marcos Jr. sa anang kauna-unahan nga SONA sa Lunes nga adlaw.
