KALIBO, Aklan–Ginkalipay it Aklan Provincial Treasurer’s Office ro pagkasueod it probinsya sa Top 3 sa may pinakamataas nga collection efficiency sa tanan nga probinsya sa nasyon.
Suno kay Bernardino Villaruel, mabahoe nga dungog para sa probinsya it Aklan nga mapabahin sa listahan it Bureau of Local Government Finance bilang sambilog sa mga National Top Performing Provinces, Cities, ag Municipalities sa Local Revenue Generation for Fiscal Year 2021 kaibahan ro Revenue Generation Hall of Fame Awardees.
Ginpahayag dugang ni Villaruel nga ro award nga nabaton hay pinaagi man sa pagtinguha it andang opisina sa suporta it gobyerno probinsyal bangud sa mga innovation nga ginhimo sa kasagsagan it pandemya.
Sambilog eon suno kana ro ginlunsar nga online payment kon siin updated ro tax and collection bangud nga may mga tax payer gihapon nga nagabayad sa tunga it pandemya.
Ro ginpabaskog nga health system kon siin naduea ro kabaeaka it mga taxpayers nga magpadueong sa andang opsina agud nga magbayad bangud sa health protocol nga ginpatuman.
Ro probinsya it Aklan hay naka-kolekta it P395.29 Milyon halin sa target nga P321.18 Milyon kon siin umabot sa 123.1% ro collection efficiency it probinsya.
Angot kara, eubus nga ginpasaeamatan ni Villaruel ro mga taxpayers bangud nga kon bukon it pordahil sa anda man nga pag-obliga it andang responsibilidad hay inde maangkon it probinsya ro nasambit nga kadungganan.
