Nagpaguwa it anunsiyo ro mga kompanya it langis sa nasyon angot sa uman nanda nga pagpatuman it mabahoe nga bawas presyo sa andang mga produktong petrolyo nga naging epektibo makaron nga adlaw.
Base sa ginpaguwa nga abiso it mga kompanya it langis nga ginpangunahan it Pilipinas Shell, Petron Corporation, Seaoil, PTT Philippines, Total Philippines, Unioil, Petro Gazz ag Phoenix Petroleum nagpatuman it dugang nga presyo nga P2.10 sa kada litro it gasolina samtang bawas presyo man nga P2.20 sa kada litro it diesel ag P2.55 sa kada litro it kerosene epektibo alas-6 makaron nga agahon.
Nauna eon nga nagpatuman it bigtime oil price rollback sa kaparehong kantidad ro kompanyang Caltex nga naging epektibo alas-12:01 kaina it aga-aga samtang ro kompanyang Cleanfuel hay magiging epektibo alas-8:01 it agahon.
Ro ginapatuman nga mabahoe nga bawas sa presyo it mga produktong petrolyo hay tuga sa gihapon it padayun nga paghueag it presyuhan kara sa pangkalibutanong merkado.
Madumduman nga ko nagtaliwan nga domingo hay nagpatuman it dugang nga presyo nga .75 sentimos sa kada litro it gasolina samtang bawas presyo man nga 60 sentimos sa kada litro it diesel ag 75 sentimos sa kada litro it kerosene.
Kaibahan sa mga nakikitang rason it rollback sa petrolyo hay ro epekto it ginpatuman nga pagtaas it US Federal Reserve ko nagtaliwan nga buean.
Base sa pinaka-ulihing paghueag it presyo it mga produktong petrolyo, kapin sa P19.65 pesos per liter eon ro net increase sa gasolina samtang P32.35 pesos per liter sa diesel makaron nga dag-on .
