Sangka TikTok influencer sa Australia ro nag-viral bangud nga medyu gintubuan imaw it “sungay’’ bangud sa saea nga pagparetoke.
Nag-viral ag naging sueod it news headlines sa Sydney, Australia ro 21-anyos nga si Jessie Carr bangud sa palpak nga “fox eye” procedure nga naging rason agud nga mag-itsura imaw nga “alien nga may sungay’’.
Ro “fox eye” procedure hay ro uso apang kontrobersiyal nga beauty trend makaron sa Hollywood ag iba pang western countries.
Kaabuan sa mga nagapa-obra it nasambit nga procedure hay ro mga kababayin-an nga Caucasian nga gustong tuearon ro singkit ukon “slanted” nga mata it mga Asyano.
Ro American model nga si Bella Hadid ro sambilog sa mga nagpauso it nasambit nga plastic surgery trend.
Suno kay Carr, nagbayad imaw it $2,000 para sa procedure.
Apang nauyang eamang ro mabahoe nga kantidad nga nagastos nana kat nakaangkon it “protrusions” sa anang dahi nga medyu mga sungay.
Mag-eowas kara, naghaeok ro anang dahi nga naging rason agud nga mag itsura imaw nga alien.
Insigidang nagbalik sa anang plastic surgeon si Carr ag gintaw-an imaw kara it paunang medikasyon sa inflammation it anang itsura.
Nag-abot it pilang session sa doctor si Carr antes nga nagbalik ro anang dating itsura.
Suno kay Carr, sobra nana nga ginhinoesuean ro pagparetoke ag nagpromisa nga owa eon imaw it igapa-obra sa anang itsura maskin hin-uno.
