KALIBO, Aklan–Naging maayos ro pagbukas it school year 2022-2023 sa bilog nga Western Visayas umpisa ko Lunes, Agosto 22 hasta Biyernes suno sa Department of Education ukon DepEd.
Suno kay Dr. Hernani Escular, Jr. tagapaghambae it DepEd-6 nga base sa assessment it andang mga coordinators halin sa nagkaeain-eain nga probinsiya sa Region 6, owa it anuman nga nataeupangdan nga mabahoe nga problema sa pagbukas it klase.
Pilang minor problems eamang sigon ro nailista kapareho it owa pagsuksok it face masks ag owa pagsunod sa social distancing it mga ginikanan nga nagahueat sa andang mga unga sa waiting area.
Apang natigayon man raya nga masolusyunan it DepEd, lokal nga gobyerno ag mga kapulisan.
Angot kara, ginpasaeamatan ni Dr. Escular ro PNP ag iba pang force multipliers kapareho it barangay tanod nga nagbulig kanda. Ginpahayag dugang nga hugut nanda nga ginapatuman ro health protocols sa sueod it mga eskwelahan kadungan sa pagpatigayon it face to face classes.
