Ginaeauman nga magiging masadya ro ginakaeangkagan nga dag-unang selebrasyon it Kalibo Ati-atihan festival kasunod it ginapabutyag it lokal nga gobyerno nga planong madayon eon raya sa masunod nga dag-on sa buean it Enero.
Raya hay matapos nga ginapreparahan eon ro nakataeana nga selebrasyon it opening salvo sa Oktobre 8 it presenteng dag-on.
Ginpatpat ni kagawad Mark Sy, tagapaghambae ni Kalibo mayor Juris Bautista nga nakapresentar eon sigon sa alkalde ro planong mga aktibidad sa nasambit nga petsa kon siin paga-umpisahan raya sa Oktobre 7 nga ginatawag desperas de salvo kon siin may igapatigayon nga car show sa covered court ag sa gabie hay may pagahiwaton man nga dance contest sa pastrana park nga gin-organisa it sangka pribadong grupo nga pagasundan man it pagtukar it mga nagkaeain-eain nga DJ’s.
Samtang sa Oktobre 8 ro highlights sa opening salvo hay ro state of the municipal address ukon mayor’s report to the people ni mayor Sucro nga pagahiwaton sa pastrana park bangud nga gusto sigon kara nga maabong makabati sa anang hinimuan sa sueod 100 diyas nga pagpanerbisyo bilang alkalde it capital town it Aklan.
Pagkatapos kara hay ro pormal nga pagbukas it Ati-atihan festival kadungan sa pagpatik it mga nagkaeain-eain nga grupo nga magapasakop.
Uwa suno kana it contest nga matabo sa nakataeana nga opening salvo kundi puro eamang kasadyahan matapos ro haeos daywang dag-on nga pagpaiway kara bangud sa pandemya.
