KALIBO, Aklan–Balik eon sa normal ro pagpangabuhi it mga Indonesian eabi eon ro sitwasyon it mga Pinoy sa Indonesia.
Raya hay matapos nga naeampuwasan nanda ro haeos daywang dag-on nga pagpanaeasa it covid-19 pandemic.
Suno kay Bombo International Correspondent Ginavella Limpin-Cumla it Jakarta, Indonesia nagbalik eon sa face to face classes ro mga estudyante kon siin uman nga nabuhi ro pangabuhian it mga Filipino teachers ag inde eon nanda kinahang-ean nga magstruggle sa pagpatigayon it online classes.
Apang, bilang pagstrikto sa ginapatuman nga health protocols hay insigida nga ginasarado ro grade level sa sangka eskwelahan kon may estudyante nga infected it virus agud nga inde eon makatapon sa iba.
Sa pihak kara, mataeopangdan man ro pagbukas it mga maeagkuan nga malls kon siin haeos adlaw adlaw hay puno it mga tawo nga nagashopping ag naga unwind.
Padayon man suno kay Cumla ro pagpadumdom it andang health authorities nga magdahan gihapon agud nga inde magkasakit it covid-19.
Uwa eon man sigon it mga Pinoy nga napabalitang infected it nasambit nga virus.
