KALIBO, Aklan—Ginlaygayan ro mga homeless ukon mga owa it baeay sa California, USA nga mag-agto sa mga local parks, air conditioned nga mga libraries ag iba pang maeamig nga lugar agud nga makalikaw sa grabeng init it paniempo.
Suno kay Bombo International Correspondent Greg Aguilar it California nga kaabuan sa mga residente hay naga-agto sa mga beaches eabi eon sa weekend.
Nagapabilin nga problema it gobyerno ro mga palaboy ukon may mga diperensiya sa paminsaron nga nagapaeagiw sa mga cooling centers nga ginadaehan kanda ag nagabalik sa mga kalye.
Gin-abisuhan man ro tanan nga pirmeng mag-inom it tubi ag magpabilin sa sueod it mga baeay ukon sa mga mahandong nga lugar.
Sa pihak it pagpanaeasa it heatwave, ginpahayag ni Aguilar nga owa man it napabalitang namatay ukon inatake it andang mga sakit.
