Gin-enganyo ni Sen. Alan Peter Cayetano ro Development Budget Coordination Committee (DBCC) nga imbestigahan ro posibleng sindikato nga sa likod it iligal nga realignment it bilyun-bilyong pisong pondo sa 2023 proposed budget it Department of Public Works and Highways (DPWH).
Ginpahayag ni Cayetano nga bilang dating House speaker, may nagakaeain-eain nga sources nga nakasugid angot sa grupong nagakontrol sa alokasyon it mga proyekto sa nagakaeain-eain nga congressional districts.
Suno kay Cayetano, dati ro “parking of funds” hay masami nga ginahiwat sa bicameral level ag maintok eamang ro pondo apang sa makaron hay naging bilyoneon ro gina-istoryahan.
Dugang pa kara ni Cayetano nga sandig sa sugid kana, ginabuhinan sigon ro budget it mga distrito tapos paga-istoryahon ro congressman it nasambit nga distrito kung pwedeng ibalik ro gintapyas pondo apang sanda ro magapili it proyekto ag contractor nanda ro magatrabaho kara.
Samtang, angot pagid kara ro panawagan ni Cayetano kay Finance Sec. Benjamin Diokno bilang head it DBCC nga imbestigahan ro alegasyong may sindikato sa illegal parking it pondo.
