Nagtuga it kahadlok ag kakoeba sa mga overseas Filipino workers ukon OFW’s ro naeksperyensyahan nga magnitude 6.9 nga linog sa Taiwan.
Suno kay Bombo International Correspondent Darmel Libona, tubong Brgy. Tugas, Makato apang presenteng nagatrabaho sa Taitong, Taiwan nga pagkabatyag it nasambit nga linog hay insigida sanda nga nagdaeaeagan sa lugar nga eowas.
Ginpahayag dugang nga sanda eamang nga mga Pinoy ro medyo nagpanic apang ro mga Taiwanese hay kalmado eamang samtang nagaduyan-duyan ro edipisyo kon siin sanda nagatrabaho.
Sanay eon suno kana ro mga residente sa linog bangud nga prone sa nasambit nga insidente ro nasyon.
Suno pa kay Libona, maeapit sa anang ginatrabahuan ag mismong ginaagyan nana ro nautod nga tulay tuga it mabaskog nga pag-uyog.
Ro mga edipisyo sa nasambit nga nasyon hay nakadesinyo para sa linog kon siin ro mga nagkarumpag nga establisyimento hay mga luma eon.
