KALIBO, Aklan—Gindayaw it Filipino community sa Amerika si Pangueong Ferdinand Marcos, Jr. bangud sa anang mga ginplastar nga plano para sa Pilipinas.
Raya hay kasunod it pakikipagkita kara sa mga Pinoy sa US antes ro anang pag-atubang sa United Nations General Assembly sa New York.
Suno kay Bombo International Correspondent Greg Aguilar it California, USA nga ro diskurso ni Marcos hay nakaangkon it positibong imahe para sa Pilipinas sa UN community ag sa investment world.
Mag-eowas kara, nagustuhan man it mga Pilipino ro pag-apela it Pangueo sa US nga wakasan eon ro Asian hate crime eabi eon sa mga Pinoy kasunod it naexperiensiyahan nga COVID-19 pandemic.
Nagaeaum man ro mga Pinoy nga magamadinaeag-on ro Pangueo sa handum kara nga makaangkon it food security ro Pilipinas tuga it kalisod ag gutom nga nabatyagan it bilog nga kalibutan bangud sa nagapadayun nga giyera it Russia ag Ukraine.
Nagpangayo man sigon raya it bulig sa ibang mga nasyon nga maeakip ro Pilipinas nga maging miyembro it security council.
Sambilog sa tuyo it working visit ni PBBM hay ro pagsiguro it mga bag-ong investors sa Pilipinas nga magahalin sa Amerika.
Pinaagi kara, ginpahayag ni Aguilar nga nagaeaum ro kaabuan it mga Pinoy nga eubusan nga makabangon ro ekonomiya it nasyon ag makatau it maabu nga trabaho sa mga pumueuyu.
Samtang, nagapanguna sigon nga topiko sa UN general assembly hay ro giyera sa tunga it Ukraine ag Russia.
Kaibahan si PBBM sa masobra sa 150 nga lider it mga nasyon nga nagpasakop sa 77th UN General Assembly kun sa siin nataw-an it mabahoe nga oportunidad ro presidente nga maka-diskurso.
