KALIBO, Aklan–May mga nag-walk-in gihapon sa ulihing adlaw it payout para sa educational assistance it Department of Social Welfare and Development ukon DSWD makaron nga adlaw it Sabado, Setyembre 24.
Suno kay alyas Akhmad, sambilog sa nagpasimpalad nga masyado sanda nga dismayado bangud nga owa nakabaton it ayuda para sa anang daywang ka unga nga puro high school.
Makabig suno kana nga unfair ro natabu bangud nga ginsunod man nanda ro proseso ag nagapati nga eubus sanda nga nagakinahangean it bulig.
Samtang, sambilog pa sa nag-walk-in hay nagpahayag nga nagbaligya pa sanda it manok agud nga may ipamasahe.
Nagpa-register sigon sanda online, apang owa gid nakabaton it text message ukon confirmation rason nga nag-agto eon lang sanda sa venue sa ABL sports and cultural complex.
Samtang, pila sa mga nakabaton it text message hay temprano nga nagpila agud nga masiguro nga temprano man nga maproseso ro andang aplikasyon sa educational assistance.
