KALIBO, Aklan–Nag-umpisa eon ro makolor nga month-long celebration it Enchanting Balete bilang kaparte it selebrasyon it kapiestahan ni St. Rafael the Archangel sa Oktobre 24.
Ginpahayag ni Balete Vice Mayor Patrick Lachica nga ginakalipay nanda ro mainit nga pagbaton it mga pumueoyo sa mga aktibidad nga andang ginplastar.
Nasayuran nga nag-umpisa ro pagbaeay it nasambit nga konsepto ko 2010 kung siin eubusan raya nga nataw-an it katumanan pagkataliwan it sang dag-on.
Sambilog ro bise alkalde sa nagproponer nga makaangkon it kaugalingon nga identity ro banwa eabi eon pag-abot sa tourism and culture.
Ro Balete hay sambilog sa mga gina-idolo pag-abot sa manami nga pag-alaga ag pagpreserba it mga kultura ag tradisyon nga nakabugtawan it andang nasakupan.
Ginpabugae man kara nga kaibahan nanda ro religious sector ag bilog nga komunidad sa pagpatigayun it mga programa ag aktibidad.
