Ginsuhestyon it Kalibo shopping center vendors association nga sa baylo nga magpatindog it bag-ong mall sa idaeom it public-private partnership hay ayuson eon lang ro edipisyo ag ipabilin ro tatak kara bilang historical shopping center sa banwa it Kalibo.
Raya hay kasunod sa proposal it Victory Central Mall sa lokal nga gobyerno pinaagi kay mayor Juris Bautista.
Ro punterya it pribadong kumpanya hay ro shopping center nga presenteng ginaokupahan it mga negosyante it native products, cosmetics, patahian ag maabong iba.
Suno sa presidente it asosasyon nga si Engr. Jun Beltran, ko mga nagtaliwan nga dinag-on suno kana hay may kapareho man nga proposal ro ibang pribadong kompanya apang uwa raya madayon bangud nga sanda mismo nga mga negosyante hay nagpaabot it andang disgusto bangud nga inde nanda masarangan ro renta ag gaeastuson sa oras nga maging mall eon ro shopping center.
Magiging fully airconditioned eon raya ag ro mga stall holders sa shopping center hay mga native products ag ro iba hay nagasalig manlang man sa pang-adlaw adlaw nga kita ro andang pambayad sa renta.
Ro ana sigon kara nga suhestyon dati hay mag-usoy eon lang it eogta sa guwa it Poblacion, Kalibo ag idto ipatindog ro andang ginaduso nga mall.
Sa makaron suno kana hay uwa pa sanda ginpatawag it alkalde para istoryahan ro nasambit nga isyu.
