KALIBO, Aklan—Nagpaabot pakikisimpatiya ag pagkasubo si Kalibo Sangguniang Bayan member Augusto Tolentino angot sa pagkamatay it batikan ag kilaeang broadcaster nga si Persival Mabasa ukon mas kilaea sa tawag nga Percy Lapid.
Suno kay Tolentino, sangka Aklanon si Percy apang nakabase raya sa bahin it Las Piñas.
Maskin sigon ro European Union, Canada ag Netherlands hay nagpaabot man it andang pagkasubo ag pagkabaeaka matapos ro pagbaril-patay kay Lapid.
Dapat sigon nga maid-id nga ma-imbestigahan ro hitabo para maprotektahan ro iba pang media men.
Ro pagpatay suno kana sa mga katapo it media hay makabig nga pag-atake sa freedom of expression nga ginapaabot sa ere.
Ro kada journalist ag broadcaster sigon hay ginasugae ro kabuhi para sa nasambit nga profession rason nga nagakadapat eamang nga protektahan ro andang kinamatarong ag kaeuwasan.
Gin-aku man ni SB Tolentino nga maskin imaw hay nakabaton man kato it pagpamaeag ko tyempo nga nagatrabaho pa imaw bilang media.
Madumduman nga gin-baril it daywang ka mga suspek nga sakay it motorsiklo sa guwa mismo it gate it andang baeay sa sa Las Piñas si Lapid ko adlaw it Martes.
Gintinguhaan pa raya nga madaea sa ospital apang owa eon nakaabot.
