KALIBO, Aklan—Obligado ro mga residente it coastal areas sa banwa it Tangalan nga magpatigayon it regular nga paglimpyo agud nga maangkon ro ecological balance ag maayos nga palibot.
Suno kay Tangalan Vice Mayor Gene Fuentes nga matapos nga gin-endorso sa committee hearing it provincial board ro gindihon nanda nga ordinansa hay insigida raya nga gin-aprubahan sa plenaryo.
Ro ordinance no. 2022-202 nga imaw mismo ro nag-author hay naga-require sa tanan nga mga pumueuyu nga naga-istar maeapit sa baybayon nga magpatigayon it community based coastal cleanup activities kada ikatlong sabado it buean bilang pagsunod sa RA 9003 ukon Ecological Solid Waste Management Act of 2000 ag RA 9275 ukon ro Philippine Clean Water Act of 2004.
Raya hay pagapangunahan it barangay ecological precinct nga ginapamunuan it punong barangay ag mga kagawad nga kaibaan sa committee on environment ag iba pang sektor sa barangay.
Gindugang pa ni Fuentes nga agud nga malikawan ro pagkalhit it mga basura sa baybayon, gina-obliga man ro mga resort owners eabi eon sa Jawili beach nga sambilog sa mga tourist spot sa Aklan nga magpatigayon it paglimpyo adlaw-adlaw.
Mag-eowas kara, maabu man sanda nga gina-maintain nga marine sanctuary kaibahan ro coral planting program.
Agud nga masiguro nga magapasakop ro limang mga barangay, magapatigayon it dag-unan nga search para sa pinaka-malimpyo nga barangay.
Apang sa pihak kara hay may igapapanaog man sanda nga sanction ukon multa sa mga mapas-eawan nga magsunod rason nga nagakinahangean nga mai-publish anay sa mga lokal nga peryodiko.
Nasayuran nga ro Tangalan ro kauna-unahan nga banwa nga nagpatigayon it makarondaya nga lehislasyon nga gindayaw it kaabuan.
