Ginpamalibaran ni Vice President ag Education Secretary Sara Duterte ro claims nga “rebranding” sigon it Department of Education (DepEd) sa terminong Martial Law sa New Society ukon Bagong Lipunan.
Ginhimu it sekretarya ro nasambit nga pahayag matapos ro panawagan it pilang manugturo sa withdrawal it Senior High school module nga may titueo nga “21st century literature from the Philippines and the World Quarter 1 – Module 1: Geographic, Linguistic, and Ethnic Dimensions of Philippine Literary History from Pre-colonial to the Contemporary.”
Sa nasambit nga module nakapasueod ro sangka kataga kung siin gintawag ro Martial law bilang sangka “period of New Society”.
Sa pihak it mga nababaton nga reklamo, gin-insister ni Education Secretary Duterte nga owa it plano ro taeatapan nga paeaon ag islan ro kamatuoran
Ginpahayag dugang pa it sekretarya nga sayod kara ro importansya it Martial Law ag EDSA Revolution sa kasaysayan bilang sangka nasyon kapareho it milyon-milyun nga mga pumueuyong Pilipino.
Suno pa kay Duterte nga ro terminong Martial Law ag New Society ukon Bagong Lipunan hay parehong historically accurate.
Ro “Bagong Lipunan” hay nagatumod sa programa nga ginlunsar kato ni dating Pangueong Ferdinand Marcos Sr. sa anang administrasyon ag sangka historical fact nga ro Martial Law hay nagasimbolo sa 14 nga dag-on nga pagdumaea it dating Pangueo.
Gin-insister man ni Duterte nga ro nag-viral sa social media angot sa rebranding it Martial Law sa terminong Bagong Lipunan hay nakasentro sa sangka linya eamang ag bukon it bilog nga papel it nasambit nga module.
