Nagpatigayon it information dissemination pinaagi sa sangka seminar caravan ro lokal nga gobyerno it Kalibo kaibahan ro Office of the Provincial Veterinarian sa mga swine ag hog raisers.
Raya hay agud nga mapabaskog pa gid ro pagbantay ag makaangkon it nagakaigo nga kasayuran para malikawan nga makasueod sa banwa ag bilog nga probinsya it Aklan ro African Swine Fever ukon ASF nga presenteng nagapanaeasa sa pilang ka banwa sa probinsya it Iloilo.
Suno kay Janna Rose Nepomuceno, veterinarian 1 it LGU Kalibo nga ro nasambit nga seminar caravan hay sponsored it Iloilo-Bacolod Association kon siin pilang dag-on eon man nanda nga partner ro nasambit nga grupo sa kampanya kontra sa ASF.
Panugyan ni Nepomuceno sa mga hog raisers nga inde pagpakan-on it damog ro andang mga alaga nga baboy ag pasanyugon ro security measures bangud nga uwa pa it bakuna nga nadiskubrehan para sa nasambit nga sapat kamana man uwa it bueong ro virus.
Dapat suno kana nga inde gid makasueod ro virus sa Aklan bangud nga makaapekto raya sa pangabuhian ag negosyo.
