KALIBO, Aklan—Ginpaandaman ni Kalibo vice mayor Cynthia Dela Cruz ro publiko sa paeag it leptospirosis bangud sa naexperiensiyahan nga maeapnagon nga pagbaha kahapon nga adlaw it Miyerkules sa nagkaeain-eain nga lugar sa Aklan tuga it bagyong Paeng.
Gin-abisuhan ni vice mayor Dela Cruz nga sangka medical doctor man ro publiko nga kon pwede hay indi gid mag-ubog sa baha ag kon kinahangean hay dapat nga magsuksok it proteksyon kapareho it bota agud nga malikawan nga makaangkon it leptospirosis nga kaeabanan nga nabobo-oe sa tubi-baha nga kontaminado it leptospira bacteria nga nagghalin sa ihi it eanggam ukon iba pang infected nga sapat.
Gin engganyo man nana ro mga kalibonhon nga mag-agto sa rural health unit nga magpareseta ag magbo-oe it bueong nga pwedeng makatapna sa sakit kapareho it doxycycline.
Kaibahan suno kana sa sintomas it leptospirosis hay mataas nga eagnat, pagsakit it mga kasu-kasuan, pagpuea it mata, ginakunyag, grabeng pagsakit it ueo ag pagdueaw it panit.
Engkaso suno kana nga eagnaton daywang adlaw pagkatapos nga mag-ubog sa baha, insigidang magpakonsulta sa pinakamaeapit nga health center agud nga masiguro ro inyong ikamayad nga eawas.
