Kasunod it mabaskog nga uean ag paghampak it mabaskog nga humbak hay ro pag-anunsiyo man it Philippine Coast Guard ukon PCG-Aklan it kanselasyon it tanan nga biyahe maghalin sa Caticlan jetty port sa Malay, Aklan.
Bangud kara maabo man nga mga pasahero ag turista ro stranded sa nasambit nga pantalan.
Suno kay Coast Guard Senior Chief Petty Officer Dominador Salvino it PCG-Aklan nga nag-anunsiyo sanda it pagkansela it tanan nga biyahe bangud sa ginpaidaeom kahapon adlaw it Sabado sa tropical storm signal no.2 ro western side it probinsya it Aklan tuga it pagpaeanasa it bagyong Paeng.
Suno pa kay Salvino nga insigida man sandang nagpaabot it pag-asister sa mga stranded nga pasahero eabi eon gid sa pagbulig nga makakita it temporaryong matiniran ro mga raya sa mainland Malay.
Apang ro ibang mga pasahero hay ginpili eon lang magtinir mismo sa Caticlan Jetty Port.
Sa makaron nagapabilin nga kanselado ro tanan nga biyahe it mga roll-on-roll-off ukon roro vessel maghalin sa Caticlan Jetty port paagto it Batangas, Oriental Mindoro ag Romblon bangud sa padayon nga naka-idaeom sa storm signal ro nasambit nga mga lugar.
Sa pihak kara ginapadumdum it taeatapan sa mga turista ag nagabiyahe nga magpamati sa guidelines it mga natungdan agud nga malikawan ro anuman nga aberya ag maghueat eon lang it masunod nga mga advisory angot sa nasambit nga mga biyahe
